Kapampangan Literature : Talambye ng Heneral Jose Alejandrino

josealejandrino1

King gintu nang sale balen tang Arayat
Atin linto supling uliran ya dapat;
Salaminan king biye ning diwang masampot
Malugud king balen lalam tang WATAWAT;
Ing albun ning biye na wagas yang misulat
King diwang memalen e sukat mikatkat.
Banuang mipanganak ing mesabing bungsu
Libu walung dalan ampon pitung pulu (1870),
Bunga reng pakamal detang adwang pusu
Mariano Alejandrino, kayang Ninunu;
At Rosa Magdangal, itang kayang Indu
Jose, ya ing anak pinili rang lagyu.
Sapni yang mayaman ing mesabing pungul
Ing wagas a lingap yang kaya paragul;
Mura nag pamisip sukat nang magambul
Balang linto diwa uyat nang pamyukul;
Linub deng megaral e neman tinutul
Tukud na’t guyabnan biye nang paintungul.
Karin ATENEO ampon SANTO TOMAS
Minuna ng liban kabyasnan tinuklas;
Karin ya migkamit BACHELOR OF ARTS
Iti makatala king banuang linipas;
Ing kayang talino ban lalung tumalas,
King aliwang bansa, karin ya pa miras.
Minta ya España linub yang megaral
Karin Ghent king Belgium, migkamit yang dangal;
Mika TITULO yang HINIERO KEMIKAL
Karin akayabe, y Gat Jose Rizal;
Bista’t marayu ya king tibuan nang lugal
Alina kelinguan ing kayang pakamal.
Dr. Jose Rizal, yang kaya minagyag
King Aguman Mason, aliwa palakad;
Kayanib yarin keng La Solidaridad
Na kilusan Pinoy, king Madrid telakad;
Bigsikan ding Fraile, keti ra patupad
King mesabing Diaryo karin bubulalag

Ebinang melambat panaun dinantik
Y Alejandrino, keti ne migbalik;
Disnan iting bansa atinang himagsik.
King balen at pulu ding balas lilisik;
Anti mong bayani bantug masalpitik
Kusa nang mekiabe karing mighimagsik.
Ing pamilamas da pilan pamung bulan
Ilang managumpe pangkat katipunan;
Dangal ding kastila, mipuk king katasan
Misal king gabun kambe ning dewakan;
Ing Panginuan napun, yang meging alipan
At itang alipan yang meging Panginuan.
Uling ding kastila, eno misukamama
King baling labanan ilang mapupuksa;
Kanyon king Muralya, sinuku rong kusa
Pati ing kuta ra kilub ning Menila;
Bayani ning lahi, memukunan daya
Kanita inagwag sariling Bandila.

Mabinting Heneral, budning Aguinaldo
Anak ne ning Kawit, dayang Kabitenyo;
Ketang Republika, yang meging Pangulo.
Dapot inyang dalang ding Americano;
Akalaban dala kawal Pilipino
Kayabe king pangkat y Alejandrino.
Heneral kastila, Primo de Rivera
At Arzobispo ra budning Nozaleda;
King takut da karing lahing bisabus ra
Ding Americano, ilang pisukwan da;
Mesabing Pekapun, inyang milaya la
Malungkut minuli king Indung España.
Budni tang Heneral, y Alejandrino
At Heneral Luna, kayabe neng grupo;
Pareho opinion king diwa’t prinsipio
Yang gamat nang wanan karetang sundalo;
Keti Kapampangan tapat sinerbisyo
Meging kasalungat nitang Aguinaldo.
Ing Heneral Luna, gewa ng makanyan
Meging mitsa iti kayang kamatayan;
Itang Aguinaldo, gewa nang paralan
Kunwaring minaus mika kapulungan;
Luna, dinatang ya pulung ban tagunan
Beril deng pataksil karin Kabanatuan.
Budni tang Heneral, minukyat kalbaryo
Na pusung matatag y Alejandrino;
Atlu nang kapatad abe nong miglualo
Y Don Joaquin, y Don Manuel, Don Anselmo;
Sing mikakapatad atin langang Ranggo
Anak lang Arayat, dayang Pampangenyo.
Pusu rang dakila mapuri at wagas
Inutus dong kusa king pamakilamas;
Pablasang bayani ebala mayapas
Ero pitakutan mibabayang balas;
Gintu rang tagimpan karing aldo bukas
Mitimawa ya sa Indung Pilipinas.

Inyang malumpawi itang Himagsikan
Y Alejandrino, tinalan tungkulan;
Mig-Gobernador ya keti Kapampangan
Ketang trentay kwatro atin tang alalan;
Mig-Delegado ya kanitang Batasan
Sinaup melangkas PUN PALATUNTUNAN.

Y Gat Jose Rizal, meging kaluguran
Itang Aguinaldo, Hongkong ne atagmuon;
Panaun nang Quezon, iti minombrahan
Meging Senador ya, ning kekatang tibwan;
Bitbit ng talino gintu nang kaisipan
Sinuyu king balen ing wagas ng belwan.

Ding mikakapatad na pawang magiting
Suyu na king balen.. dakila maningning
Gintu lang uliran karing tawling supling
Luid yang balen tamu sukat pagmairing
Bilang katatawlian dinan talang pansing
Palakpakan tala, masikan… maningning!!!

—WAKAS—

POETA:

Julio S. Ramos
Gatiawin, Arayat, Pampanga

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s